მიხეილ ჯანელიძე ევროპარლამენტის საგარეო ურთიერთობათა კომიტეტში სიტყვით გამოვა

2017-10-18 10:45:09, 1968 ნახვა

პოლიტიკა

საქართველოს ვიცე-პრემიერი, საგარეო საქმეთა მინისტრი მიხეილ ჯანელიძე 18-19 ოქტომბერს ვიზიტით ბრიუსელს ეწვევა.

საგარეო უწყების ინფორმაციით, ვიზიტის ფარგლებში საქართველოს ვიცე-პრემიერი ევროპარლამენტის საგარეო საქმეთა კომიტეტის (AFET) სხდომაზე სიტყვით გამოვა. მიხეილ ჯანელიძე ისაუბრებს საქართველოში, მათ შორის ევროპული დღის წესრიგით, მიმდინარე და განხორციელებულ რეფორმებზე, საქართველოს ევროკავშირთან ინტეგრაციის მომავალ ხედვასა და პერსპექტივებზე, ასევე მინისტრი ევროპარლამენტარებს გააცნობს ინფორმაციას საქართველოს ოკუპირებულ ტერიტორიებზე ბოლო განვითარებების შესახებ.

“აღსანიშნავია, რომ ევროპარლამენტის საგარეო საქმეთა კომიტეტმა მიმდინარე წლის 10 ოქტომბერს კენჭი უყარა ანგარიშს „აღმოსავლეთ პარტნიორობის" შესახებ, რომელიც „აღმოსავლეთ პარტნიორობის" სამიტს უკავშირდება და მნიშვნელოვან გზავნილებს შეიცავს საქართველოს და სხვა ასოცირებული პარტნიორების ევროპულ პერსპექტივასთან და ევროკავშირთან ურთიერთობების გაღრმავების ინიციატივებთან დაკავშირებით.

საგარეო საქმეთა მინისტრის ბრიუსელში ვიზიტის ფარგლებში გაიმართება შეხვედრები ევროპარლამენტარებთან, საგარეო ქმედებათა ევროპული სამსახურის გენერალურ მდივანთან ჰელგა შმიდთან და ევროკომისიის ევროპული სამეზობლო პოლიტიკისა და გაფართოებაზე მოლაპარაკებათა გენერალური დირექტორის მოადგილესთან კატერინა მატერნოვასთან. მინისტრი ასევე მრგვალი მაგიდის ფორმატში დისკუსიას გამართავს კარნეგის ცენტრში სხვადასხვა აკადემიური წრეების წამყვან ექსპერტებთან”, - აცხადებენ საგარეო საქმეთა სამინისტროში.

ავტორი: ,

სოციალური ქსელები