დღეს მსოფლიოში ტუბერკულოზის დღე აღინიშნება

2016-03-24 14:59:45, 907 ნახვა

საზოგადოება

დღეს მსოფლიო მასშტაბით და მათ შორის საქართველოშიც, ტუბერკულოზის მსოფლიო დღე აღინიშნება.

ამ დღესთან დაკავშირებით, თბილისში, მოსწავლე ახალგაზრდობის სასახლის მიმდებარე ტერიტორიაზე, საქართველოს წითელი ჯვრის და საქართველოს ტუბერკულოზის კოალიციის ორგანიზებით აქცია "გავერთიანდეთ ტუბერკულოზის დასამარცებლად" გაიმართა.

"აქცია მიზნად ისახავს ტუბერკულოზის შესახებ საზოგადოების ცნობიერების ამაღლებას. მიუხედავად იმისა, რომ ტუბერკულოზი განკურნებას ექვემდებარება, სამწუხაროდ ეს პრობლემა დღემდე არსებობს. ჩვენ ქვეყანაში ამ მხრივ სიტუაცია საკმაოდ ცუდად არის. ამის მიზეზი პირველ რიგში არის სტიგმა და დისკრიმინაცია, რომელსაც ამ დაავადების მქონე პაციენტების მიმართ ახორციელებენ. ჩვენი მიზანია, რომ დავანგრიოთ ეს სტიგმა. თუ არ გვეყოლება ტუბერკულოზით დაავადებული, აღარ იქნება ტუბერკულოზი", - განაცხადა საქართველოს წითელი ჯვრის საზოგადოების ტუბერკულოზის პროგრამის კოორდინატორმა ნინო ოსეფაიშვილმა.

ცნობისთვის, 24 მარტი არის ტუბერკულოზის მსოფლიო დღე. 1882 წელს 24 მარტს ნობელის პრემიის მფლობელმა, გერმანელმა მეცნიერმა რობერტ კოხმა ტუბერკულოზის გამომწვევი მიკრობაქტერია აღმოაჩინა. სწორედ ამ დღის აღსანიშნავად, 24 მარტს იმართება სხვადასხვა სახის აქციები.

პარალელურ რეჟიმში ზუგდიდის რაიონ სოფელ რუხში ამ დღესთან დაკავშირებით მასშტაბური აქცია მიმდინარეობს. იმართება მსვლელობა სლოგანით "ტუბერკულოზს არ აქვს საზღვრები- გავერთიანდეთ ტუბერკულოზის დასამარცხებლად".

ავტორი: ირაკლი მანაგაძე , ექსპრესნიუსის რეპორტიორი 2009 წლიდან